تكنه الاخت عيوش

--------------------------------------------------------------------------------

السلام عليكم

سوري ترا كنت بكتب

المهم نخش في الموضوع طوالي :::

في اشخاص اذا قلت لهم انت طاوله ازعلوا

ليـــه ..

طاوله!!

ترا الطاوله يا اخوان شي كويس!!

تخيلو الدنيا بدون طاولات!! وين نحط الاشياء .؟

على الارض؟؟؟

و مثلا.. تنس الطاوله

بدون طاوله كيف نلعب؟؟

عشان كذا اللي اشوفه يغلط على الطاولة او يسيء استخدامها بأتوطا في بطنه
:::

التيس..

التيس حيوان لطيف.. و أليف

يعتبر من الحيوانات الأليفه الي تربى في البيوت

الواحد يقدر يربي قطوه,, او كلب..

ليه ما يربي تيس؟

يسرح و يمرح التيس داخل البيت.. و تسمع صوت حوافره على الرخام..
و هو يتمخطر و يتدلع في الركض ..

تركت تركت تركت تركت (هذا صوت التيس ينزل مع الدرج)

والله صحيح.. المفروض الناس يبدون يغيرون عن الكلابه و القطاوه

يربون تيوس.. وش ملحه التيس.. يجنن.. و عيونه حلوه

أنا شفت تيس عند خويتي مسمينه طوني.. عيونه عسليه التيس,, ياخذ العقل

التيس حاجه كويسه..

حيوان جميل.. و حساس

يقول المثل "التيس اوفى صديق للانسان"

عشان كذا اللي اشوفه يغلط على التيس او يجرح مشاعره بأتوطا في بطنه..::::

سؤال: ليه الحلزونه شايفه نفسها؟؟

ما احد فكر بهالشي؟؟

دايما تمشي رافعه خشمها..

تجر بيتها فوق ظهرها و لا تناظر في احد..

انا ما اثق في الحلزونات...

عشان كذا اللي يماشي حلزونه بأتوطا في بطنه:::

بامبرز ...

والله هالبامبرز شي خطير..

من أكثر الاختراعات روعه و فعاليه..

البزر يتمشى و هو مرتاح ولا على باله..

متى ما صكه في راسه .. عملها..

قدام النااااس .. ما فيه اي مشاكل.. انزنق! يعملها ولا كنه في شي..

حتى لو كان البزر يتكلم او يسولف مع احد! مو لازم يستأذن او يقطع المحادثه..

ولا حتى يسكت .. وهو يسولف .. وررررررر .. يعملها

طيب ليه ما يعممون البامبرز على كل الاعمار؟؟

ليه نضيع و قت و جهد للروحه للحمام؟؟

و نضيع فلوس في بناء الحمامات؟؟

كل واحد يطق بامبرزه و يتمشى و يرتاح

تشوف سراويل الناس متنفخه.. كلهم لابسين بامبرز.. عادي .. شي طبيعي يصير

و الناس تمشي.. تسمع صوت خشخشه البامبرز.. خشش خشش

عااادي..

ولا تتعب نفسك و تروح للحمام.. و انت تناظر التلفزيون!! مو أريح؟

و كل واحد يغير لنفسه

لذلك أنا أطالب شركه بامبرز انها تصنع جميع المقاسات..

و تحط نوع نسائى.. و نوع رجالي

و تريح الناس من عناء الروحه للحمام

و اللي يعارض اقتراحي او ما يلبس بامبرز معي بأتوطا في بطنه ::::


المناكير..

ممكن أعرف ليه المناكير للبنات بس؟؟؟؟<< هذا واحد خكري يشكيلي همه
ههههههههههههههههههه

لييييييييييييه؟

طيب الولد اللي يحب المناكير؟؟!!

من اللي قرر ان المناكير للبنات بس؟؟؟

اوكي.. المكياج و الاكسسوار و العدسات الملونه.. ما اختلفنا للبنات

لكن المناكيييير ليه للبنات؟؟

و اللي بيتطنز على الولد اللي يحط مناكير او بينقده بأتوطا في بطنه:::

فيه شي ثاني مفيد و مريح.. لكن برضو خلوه للبنات بس!!

الـ " هيلاهوب "

ترا الهيلاهوب شي جميل..

شراب + بجامه في وقت واحد!!

ليه تحرمون الرجال من اختراع مفيد مثل هذا!!

هيلا هوب

حتى اسمه حلوه....

هيلا هوب,, هيلاهوب

شوفو وش زينه.. هيلا + هوب

فيه احلى من كذا؟

احسن مما كل شوي ارفع الشراب.. و كل شوي نازله وحده من الشرابات و تتعفط داخل الجزمه..

و كل شوي ترفع الشراب..

البس هيلاهوب .. و ريح نفسك

هذا من الاشياء الغير عادله في الدنيا.. الهيلاهوب للبنات بس!!

أنا اطالب ان الحكومه تبدا حمله اعلاميه بنشر الهيلاهوب بين الرجال.
واللي يبي يعارض بأتوطا في بطنه::: << ادري قويه ههههههههههه

ودم ددم دمتم سالمين